今年港姐總決賽，群情汹湧嘅程度，絕對係近年之冠，比起上兩屆嘅10A港姐麥明詩同粗口港姐馮盈盈，今屆港姐冠軍雷莊𠒇，話題性同關注度，絕對有過之而無不及。

某程度上，港姐選舉有咁大迴響，盡收宣傳之效，無綫開心都嚟唔切，不過手握綜藝科大權嘅高層余詠珊，港姐選舉對佢嚟講，時辰日子就似乎唔多夾佢。

仲記得12年，入主無綫初期，嗰陣擔任港姐統籌經理嘅余詠珊，推出全民網上投票選港姐「創舉」，結果系統不勝負荷搞到down機，成為港姐史上最大笑話，不單止爛尾收場，仲破紀錄收到447宗投訴。(新聞連結： http://bit.ly/2iYUUa0 )

玩咗幾年全民投票，今屆突然嚟個還原基本步，評判自己選番，但一樣搞出大頭佛，當晚右腳腳踝紮住繃帶嘅余詠珊，如常坐喺第一排睇騷，但原來喺港姐決賽開騷前，佢喺電視城canteen跌親，搞到要call人到扶佢走！(新聞連結： http://bit.ly/2eAqPsi )

坐足成晚睇騷嘅余詠珊，表面若無其事，但原來完騷後，佢即刻同老公何哲圖（Herman )飛車去醫院求診。有讀者鍾小姐透過《蘋果》嘅「爆相爆片」，周日(3日)凌晨喺浸會醫院見到余詠珊同Herman，當時余詠珊仲坐住輪椅。鍾小姐表示：「佢哋喺醫院逗留咗大約1個鐘，見女嘅冇乜表情，但就有好多醫院嘅職員幫佢哋。」相中余詠珊坐住輪椅凝神望住手中電話，旁邊仲放咗支枴杖，一副我見猶憐咁樣，最慘仲要不停接聽傳媒對當晚港姐嘅質詢，真係連病都好唔得閒。