陳慧珊（Flora）和老公鍾家鴻（Mike）自資製作節目《放學後》今晚在香港開電視首播，晚上在尖沙嘴舉行首映會，兩夫妻帶同女兒鍾律然一家三口現身，並獲眾多好友撐場，包括宣萱、胡定欣、江欣燕、曾俊華等支持。

陳慧珊和宣萱相識超過20年，情緣由二人合作拍經典劇集《壹號皇庭V》開始，Flora深刻記得：「當時我第一套劇，係新人，佢對我好nice，一直保持聯絡多年，今次邀請佢拍攝二話不說答應。」宣萱記得當年合作後Flora極速走紅，之後各自拍劇未有再合作，今次獲邀參與節目到英國拍輯，宣萱說：「可以免費去英國玩，我仲未去過利物浦，會分享英國讀書時心得。」

兩人期待再拍劇合作擦火花，宣萱反指Flora：「佢拍唔拍先係最重要，佢好唔得閒，忙去做有義意事情。好佩服Flora仍然向學，我自己讀書唔叻，每年考試都會發惡夢，唔係勤力學生，而家記劇本都冇咁好記性。」Flora即謙虛大讚宣萱：「呢啲天生聰明，唔使讀書，我又蠢又鈍，佢係用時間照顧狗狗、老人家，好有愛心回饋社會。」

Flora今早發現雙眼受感染突然紅腫，有心理準備要以黑超上陣活動，後來即到醫院求醫無礙。宣萱即說：「佢而家心態好好，例如拍攝時落雨或去唔到個地方，都好隨緣話唔緊要。」Flora因要兼顧幕前幕後頗大壓力，被宣萱取笑：「呢啲逼出嚟，以前Flora中文唔叻，而家可以寫埋稿。」宣萱十分欣賞好友才能，自己則沒有信心自主製作節目。

胡定欣入行第一套劇集和Flora合作《衝上雲宵》，對方是她拍劇第一位阿嫂及家人，收到Flora獲邀支持新節目，內容講述下一代及家長感覺倍添意義。不過節目將在開電視首播，與胡定欣大台身份有所尷尬，她說：「我支持呢個項目同埋Flora，好簡單唔需要咁複雜，最緊要個項目有意思，我入行時Flora都好照顧我。」至於有否計畫當媽媽，定欣笑說：「都要搵到異性先得。」

定欣主演劇集《包青天再起風雲》結局爛尾，定欣解釋：「好開心大家有留意到，個結尾係想有第二輯，所以留咗伏線，會唔會有機會拍第二輯就未知道，結局最後一場戲又似另一個故事開始。」但眾多觀眾網民反映對結尾不明？定欣無奈說：「係呀！做演員有時都未必明白，但成班演員合作拍時係好開心。」

日前被拍攝到連續兩天同穿一套衣服上街，被指冇換衫？定欣說：「 我有換衫，只係落一落街唔需要太考究，我慳家嘛。」

採訪：卓寶花
攝影：仇志德