做冬日，港股升近300點，師奶股神可以斬多隻雞加料。過往數據顯示，年底交投例淡，但係噚日成交再次突破千億銀，基金為做靚份成績表，睇嚟要作戰至最後一刻。
早前推介大家買四大中資板塊──A股ETF、內銀、內險及券商，前三者大漲小回格，繼續揸實，券商股少少腳仔軟，始終表叔借爆孖展炒股，已觸動阿爺神經，加上海通證券（6837）閃電批股抽水300億銀，隨時掀起板塊伸手潮，戰友不妨先沽出部份食糊，換馬其他金融股。

潛在升幅22%

有乜換馬對象？從爆發力、股東背景及AH差價角度出發，民生銀行（1988）乃不二之選。民行beta值為1.48，比起四大行平均嘅1.17高出一大截，睇好股市繼續升，買民行賺得更多！鄧小平外孫女婿吳小暉打骰嘅安邦保險，瘋狂吸納民行A股，仲升呢做埋大股東，有太子黨做後盾，民行想窮都難。民行H股現價9.71元，A股10.51元人民幣，折約13.14港元，H股比A股平近三成，折讓只比中信銀行（998）少，收窄空間更遼闊。
睇圖表，民行大棍崛起，兼創今年新高，霸氣十足。唔貪心，博AH差價收窄至一成，可見11.8元，潛在升幅22%，屆時預測PE都未夠七倍。

唐牛
https://www.facebook.com/tongcow88