公民黨九龍東地盤，成功由大狀梁家傑轉到飛機師譚文豪（Jeremy）手上，但原來傑哥做議員嘅12年間，公民黨喺樂富橫頭磡邨嘅辦事處，Jeremy接棒時未有同時繼承。Jeremy解釋過去兩年一直計劃重返樂富，與同事睇過橫頭磡邨圖則，發現一個長期空置嘅公屋儲物室，即刻向房署申請更改用途，但手續繁複、改裝需時，直至今年8月房署先開放申請，到今日佢終於可以喺樂富橫頭磡邨開檔，加上藍田以及即將啟用嘅匯景3個地區辦事處，實行全方位服務九東街坊。

傑哥今日都有到賀，佢讚Jeremy新辦事處更近地鐵站、更開揚，希望街坊覺得公民黨「總有一位喺左近」，Jeremy則多謝房署幫忙跟進，希望房署考慮改變公屋儲物室用途，等社福機構、區議員等有地方設立辦事處。有份主持揭幕禮嘅房屋署副署長黃麗冰表明房署會善用每吋空間，希望公民黨新辦事處可以加強同市民連結，為街坊帶來更多元化服務。