買樓唔一定要父幹，原來上車也可靠老闆。一向鍾意投資磚頭嘅玄學家麥玲玲，最近畀咗首期，同跟佢搵食超過10年嘅忠心員工夾錢買入西灣河嘉亨灣一個兩房單位，忠心員工唔使畀首期，每月供款連交租，大約2.56萬元就上車了。
呢位忠心員工跟咗玲玲師傅好耐，超過10年，原本想買北角街市附近嘅單幢樓單位，佢好坦白咁同玲玲講，話得40幾萬元做首期，去買個300幾萬元嘅舊樓，真係掹掹緊。

對方供樓再交租

玲玲諗完覺得，對方跟佢咁多年，「我就同佢講，不如咁啦，一人一半，我畀首期，佢供樓，圍番條數，佢可以住大咗又舒服咗，唔使擔心首期」。玲玲負責出糧，知佢收入應付到，當係一齊投資，業權各半，如果要賣樓，無論賺蝕都一人一半，不過玲玲諗住長線收租。
結果佢哋以770萬元，買入西灣河嘉亨灣2座低層G室，實用面積498方呎，玲玲畀咗一半樓價做首期，即約385萬元，每個月就由呢位忠心員工去供，假設息率2.15厘，分25年還，月供約1.66萬蚊。
供完樓，始終業權各半，單位原租約2.2萬蚊，當熟人價月租1.8萬蚊，忠心員工每月交番9,000蚊租金畀玲玲師傅。呢招確係一家便宜兩家着，大家要學嘢。

李華華
mailto:[email protected]