賭王何鴻燊今日農曆生日，三太陳婉珍同子女何超雲﹑何超蓮及何猷啟，聯同其他朋友慶祝，超蓮晚上喺ig貼全家同賭王爹哋慶祝生日大合照，只見枱上有籃大壽包，當然唔少得生日蛋糕，賭王笑到四萬咁口，超蓮留言表示：「爸爸生日快樂，今天人好多好熱鬧。」

超蓮接受《蘋果》電話訪問時表示：「知爹哋鍾意熱鬧，今日特別叫埋爹哋舊伙計上嚟，伙計就準備咗大壽包，佢好開心，伙計猛要同佢集郵，搞到爹哋好忙。我同家姐同媽咪要佢錫錫我哋，爹哋笑話錫到『抽筋』，佢好開心精神。」

超蓮表示三姊弟送咗一件比cashmere更暖嘅大褸做禮物，牌子為意牌LoroPiana，至於媽咪一如過往，送了賭王生肖雞的擺設做禮物，今晚會同賭王打牌：「佢好鐘意打台灣牌，我哋幾個同阿姨會『戥』腳，爹哋好鍾意食大牌，我哋會鬆章，畀佢食，擺定隻牌等佢自摸，食嚦咕嚦咕食幾廿番。」

至於三太透過助手回覆：「因為天氣凍，冇特別出去搞，係屋企同親友食飯都一樣，何生好開心。」三太吩咐工人煮何生平時愛吃的家庭小菜，禮物方面，三太今年都係送衣物大褸為主，還送了帽給賭王，更笑言佢好貪靚。助手話賭王今日精神好好，好開心，因為覺得仔女聚埋一齊家庭樂最緊要，三個仔女齊齊唱生日歌，祝賭王爹地健康快樂。