董團夥率眾上京照肺！唐唐抗命，八方昨日熱情表揚，點知接獲財政司唐辦秘書電話，話唐唐諗諗吓都係決定上京。
呢一招以退為進，更加令八方心服口服。冇錯，今次董團夥六國大封相，上京見主人，係十分之重要，因為胡溫揸莊，要近距離睇吓個金魚缸，今次團夥上京，係成班馬出沙圈，由胡溫親自驗毛色，睇吓有冇流鼻血。隻隻熱門馬都北上，獨係你唐唐唔畀面，咁算點先？
唐唐前日話唔上京，表示香港要有人睇住，證明愛國愛港，唔使得個講字，淨係識飲紅酒打高爾夫，點樣做特首？唐唐一句留守大本營，為咗香港人嘅利益，寧願放棄上京親狎胡總嘅千載良機，呢一樣奉獻嘅精神，相信經已感動咗中央！