王菲近日從北京秘密返港，雖然盛傳她懷有愛郎李亞鵬的骨肉，但昨日王菲前往中環購物時，只見她小腹平坦，健步如飛，而且更在車廂內煲煙，相信懷孕傳聞並不可信。

昨午四時多，頭髮蓬鬆的王菲穿着T恤及牛仔褲，偕女助手出現中環雲咸街，王菲從一幢商業大廈離開時，一個箭步就跨上停泊在路邊等候的保母車，她上車後則悠然自得地煲煙。
其後保母車駛到附近的JOYCE時裝店，王菲在店內遇上正在揀指甲油的林青霞，二人曾於電影《重慶森林》中合作，昨日難得碰頭當然寒暄一番，有講有笑。林青霞購物後先行離去，王菲則繼續揀指甲油及衣服，又到試身室試衫，不過王菲因不欲被傳媒追訪，中途從職員通道離開。
此外，數年前王菲為自己的御用監製張亞東獻唱了一首歌《我愛你》，該首歌將會收錄在張亞東的最新大碟內，雖然有傳該曲是她送給李亞鵬的，但阿菲經理人陳家瑛昨日在電話中否認說：「呢隻歌幾年前錄嘅，當時佢同李亞鵬都未拍拖，咁隻歌又點會係為佢唱呢？同埋隻歌可唔可以面世，其實要得到Sony同意。」

而王菲所屬的新力唱片公司負責人馮健強昨日則在電話中說：「王菲簽咗台灣新力之後，只係出咗《將愛》呢張碟，佢同我哋會重有合作，但因為張亞東同佢做呢首歌係幾年前嘅事，可能嗰時都未同我哋簽約，如果首歌係未出嘅舊作品，張亞東出番未必違法，即使王菲係簽新力之後錄嘅，可能係台灣嗰邊同佢有協議，所以我哋都要了解。」
採訪、攝影：娛樂突發組