「菲律賓民答那峨棉蘭老島皇室酋長蘇丹公主殿下」陳昭昭今日結婚，晚上喺何文田一間會所擺酒，一對新人仲接受訪問。之後姐妹團代表仙樂都同林雅詩一齊接受訪問，兩個都話由朝忙到晚唔夠瞓，講番今日玩新郎時，由於收到昭昭指令，都要錫住新郎嚟玩，一啲都唔夠喉。

問到開門利是方面，林雅詩話係開心價，仙樂都則表示：「佢哋好疏爽，要過三關就有五位數字。」雖然晏晝有指開門利喺$38,888，不過晚上突然「加碼」，仙樂都表示：「係五條9，即係$99,999，林雅詩仲搶住接到花球。」

問林雅詩係咪會再婚？佢話：「暫時唔諗結婚住，隨緣，想搵個錫自己嘅人先，因為自己對婚姻仲有少少恐懼，要對方可以令我冇呢個障礙先得。」問到仙樂都有冇心急想嫁？佢話：「o依家約我去街嘅男仔，都細我十年，自己都有啲驚。」