一子錯，真係滿盤皆落索？雖然話衰一鋪唔係衰全部，但慘在一而再，再而三咁衰，咁就神仙都救唔番。

好似最新熱滾熱辣衰多一鑊嘅，就係啱啱解凍、但唔知會唔會好快被雪藏番嘅主播李潤庭，由有線過檔去無綫嘅李潤庭，本來孭飛做《東張西望》主持好地地，點知被揭背住老婆Crystal偷嗒人妻Tiffany，開完記者會鞠躬道歉，但都逃唔過被雪命運，到今年4月，李潤庭獲解凍，上個月先返主播台，點知噚日再被爆同Tiffany原來未斬纜，兩人喺劏房短敍，呢鋪唔知佢點拆……

仲有早一排，被揭背未婚妻Beebs暗撻何雁詩嘅鄭俊弘（Fred），原本有劇集主題曲或片尾曲唱吓，又保持到曝光率嘅Fred，因為呢單桃色新聞，形象插水，又遭廣告商棄用，更有傳佢連演唱會都被取消，佢亦坦承有啲job delay咗。以為失事業，至少有女朋友仔錫番啦，點知何雁詩日前被發現拖「嫩版陳智燊」過馬路，Fred分分鐘做墮入「雙失」界別。

「巨聲幫」大孖周志文又係衰桃色新聞，話說佢喺12年因拍劇同馬賽拍劇時撻着，背住當時個正印女友袁紫橋（CoCo）大玩三角戀，其後又傳出佢花女食女，先後同吳若希、蔡思貝、劉珮玥、陳瀅等傳緋聞，更有指大孖曾遭時任正印嘅吳若希篤背脊，搞到差啲要執包袱離開無綫，最後靠o氹掂樂易玲先有得留低，但都係做閒角多，無緣被重用。

至於最經典嘅，仲有梁榮忠，曾經何時，忠仔係無綫重用藝人之人，至少主持又係佢，綜藝節目又見到佢，拍劇可能又望到佢，曝光率唔低，可惜佢喺05年同04年港姐亞軍朱慧敏發生「車震」事件後，入行17年累積嘅演藝成績一鋪清袋，同佢拍拖多年嘅鍾麗淇亦離佢而去，忠仔人財兩失，量地度日。

施主，色字頭上一把刀呀…