所謂聖人都有錯，何況是凡人！神級騎師莫雷拉今季時有揀錯馬例子，最經典的例子要數今季國際賽香港盃。

練馬師告東尼曾說屬意莫雷拉策騎「馬克羅斯」，但雷神卻揀騎日本代表「新寫實派」，結果潘頓執二攤接手前駒，堆贏出了全季獎金最高賽事。

近兩戰又分別有「常山耆寶」、「巴基小子」雷神輸完換人爆冷W，近期他選錯馬的例子亦不少，如棄騎的「平海福星」換莫雅贏了打吡，上周三（21日）的「上海大師」雷神操完唔騎，由何澤堯接手贏。

周三（28日）晚谷戰出爭第五場三班1200米的「美妙星」，轉入霍利時馬房初出，近期曾由雷神試閘，後者同場最終揀騎「魅影揚飛」上陣；前駒用到華將一哥梁家俊，本身在谷草曾兩度入Q更有根據，奉勸馬迷別因雷神冇揀便掉以輕心。

四歲自購馬「美妙星」來港時隸屬呂健威馬房，上季跑過五場，雖然仍未開齋，但盡顯忠心本色，四度上名獲三亞一季。

馬主葉克勇是「妙星」系主理人，此系馬大多數由霍利時訓練，像息息相關的團體馬「育馬妙星」便是，其妻朱明雅名下「韻妙星」亦受訓於時廐，不排除「美妙星」轉入時廐有歸隊成份。

姑勿論背後原因何在，「美妙星」年輕有質素，霍利時難得獲此馬加盟，定必珍而重之，盡快贏馬交代。

「美妙星」去年8月驗出左前腿脛骨受損，停課一大輪至11月才復操，今年1月又接受慢性骨科病症藥物治療，之後停操兩個星期。慶幸其後操練回復正常，今個月由田泰安及雷神分別試過大閘，名次一亞一殿，狀態越來越好。

今仗起用華將一哥梁家俊無損戰鬥力，抽到2檔靚位，兼且賺到體力上優勢，轉倉初出可為霍利時省靚招牌。