𠵱家國企話要搞整體上市，呢股政策風氣搞到外資保險公司澳洲保險（IAG）倒瀉籮蟹，失晒預算。話說舊年4月，IAG同太平洋保險（旗下壽險係中國第三大）下面嘅太保財險簽咗備忘錄，IAG打算用2.8億美金（約21.84億港銀）收購太保財險24.9%股份。
點知國策有變，太保計劃整體上市，咁子公司又點可以引入外資策略股東呢？入股阿仔單嘢冇行，咁入股母公司呢？原來又遇着「程咬金」凱雷（美資私募基金），搶先一步入股太保19.9%。
美國國際集團（AIG）高級副主席、友邦保險主席暨行政總裁謝仕榮（圖）分析，𠵱家外資入股內地保險集團仍有限制，好似太保嘅外資股東比例已經有19.9%，IAG要入股，攞盡都係得5個巴仙，根本冇董事會席位，影響唔到管理層。佢認為IAG入股太保唔成，主要係呢個原因。

AIG謝仕榮：兒子係自己嘅好

佢仲話，喺內地好難做得成收購，因為俾你收購到嘅，都係唔掂嘅公司，所以友邦會以獨資身份喺內地開分公司，又話：「兒子係自己嘅好」喎。
對於未能同太保財險如期合作，IAG行政總裁MichaelHawker日前喺聲明度話深表失望，措辭間流露出不滿，佢話，太保上市嘅考慮，以及美資私募基金參與其中嘅做法係「短期考慮」。咁話晒IAG同太保個女「拍拖」成年有多，𠵱家阿媽話要搞上市，搞到IAG同佢個女單婚事告吹，連入股阿媽嘅空間都冇埋，IAG點會唔嬲？