預算案拉布戰發展到今日，差唔多見到盡頭，大吉利是講句，今次拉布戰打咗咁耐，好似一次流會都未試過，當中除咗因為建制派出動一定數量嘅議員之外，泛民主派亦都恪守早前向建制派嘅「照會」，派出一半議員出席會議。原來成班泛民背後，有一位議員不停喺度鞭策住，而呢位仁兄、或者應該叫仁姐先啱，就係民主黨主席劉慧卿嘞。
大家都有眼見㗎啦，雖然泛民話咗會出一半人留守會議廳，但係老實講，有幾多時係做得到㗎先？而響鐘點算法定人數又不斷發生，由進入全體委員會階段開始，即係拉布戰正式開始以來，計埋噚日，響鐘次數已經有成86次，等候議員歸位嘅時間亦都花咗超過14個鐘。