C朗係唔係重返曼聯，呢一排仲未有答案，不過成功連任皇家馬德里主席嘅佩雷斯，當然要有兩手準備，包括目標指向摩納哥「新亨利」基利安麥巴比外，更加重提尼馬2013年加盟巴塞隆拿前到過皇馬體測，但最後因為「不明原因」轉投巴塞，佩雷斯舊事重提，唔通為咗硬撬尼馬做準備？

如果C朗真係離開皇馬，為保銀河艦隊威名，佩雷斯點都要簽番啲星返嚟撐場，基利安麥巴比係就係有潛質，但距離球星仲有啲距離，購入25歲嘅巴西國家隊隊長尼馬就夠晒級數。佩雷斯周二接受西班牙電台訪問時，無端端提到4年前嘅舊事，話當年仍效力山度士嘅尼馬，去過皇馬體測，加盟只差一步，不過最後就突然轉軚去巴塞。

據報其實尼馬父親同當時巴塞主席羅素私下簽訂加盟協議，尼馬老豆可以收到3千萬歐元（約2.6億港元）以上收益，如果違約，就要賠鑊金，所以先逼個仔加盟巴塞。而且呢個私下協議，有逃稅、同影響山度士收益之嫌，正喺西班牙同巴西法庭都惹上官非。

佩雷斯咁話，無非想講皇馬睇中尼馬先；其實講多無謂，俾轉會費先最實際，雖然尼馬今年先同巴塞續約，違約金加到2.5億鎊（約25億港元），巴塞以為安全，但點知宜家轉會市場咁癲，如果皇馬賣C朗同艾華路莫拉達去曼聯，據報可收番1.8億鎊及門將迪基亞，都只不過俾多7千萬鎊，就買到尼馬，足以彌補C朗離隊空缺啦。