肥仔K自倫敦回港過聖誕，因上機前一日（星期五）要交一篇五千字嘅paper，趕到天昏地暗，開兩晚通宵，星期五晚就成個人散晒，瞓到星期六上午八點半先至起到身，匆匆忙忙趕去機場搭十一點嗰班國泰客機。機場好似走難咁，人山人海，迫得好辛苦先至埋到去國泰counter，哈，啱啱全機客滿，地勤人員唔畀佢上機，只能講「鎖你，鎖你」，國泰願意賠償二百零五鎊，請佢哋改搭下午五點嘅班機。肥仔K重未知點好，排在佢後面啲香港學生已經大聲嘈，話要趕住返香港，賠二千鎊都唔制。肥仔K貪錢，諗吓等多六小時，收二百鎊，着數噃，喺倫敦做散工，一個鐘頭都係收六鎊半啫，立即講Yes。

後來佢同一啲香港學生（中學生模樣）問料，先至知道好多人早上七時已經到機場排隊，肥仔K惟有嘆一句貪睡誤事，不過因此得到二百鎊，又夠佢返嚟去黃金商場買機喎，冇蝕底啫。正是經一事，長一智，肥仔K喺現場觀察一輪，行咗幾個鐘頭，發覺唔少香港中學生幾有錢噃，有人搭頭等，有人搭商務客位，恨到佢口水流。佢讀到碩士，都未知商務客位是甚麼模樣，人哋十四五歲就坐頭等威威，想落人哋老竇係最威。
聽其他老友講過，自加拿大回港嘅學生，亦有頭等客，可見啲香港富爸爸十分痛惜仔女，但咁細個就坐頭等，是否良好家庭教育呢？我哋唔敢判斷。