莊思明、陳偉琪（Vicky）、劉溫馨與范文雅今日「胸」降荃灣行泳衣騷，4人各示範兩套新款泳衣，思明盡騷長腿，曬到一身古銅膚色嘅Vicky難掩34E驕人身材，劉溫馨與范文雅身材均勻，但未敢以三角泳褲示人，在外添加一條絲巾遮掩。

明顯瘦咗嘅思明表示選港姐後未曾試過喺公開活動穿泳衣，泳衣款式事前給咗公司過目，問到事前使唔使問準男友楊明？佢話：「其實佢幾開通，做嘢還做嘢，佢仲陪我一齊減肥，我冇刻意去磅，減咗兩個禮拜。」

思明都滿意自己身材，但今次行騷令佢明白唔可以行騷之前先減，減肥係長期工作。若果有人邀請情侶檔行泳衣騷會否考慮？佢話：「未有人邀請過，要等佢（楊明）操吓先，佢不嬲都有少少（腹肌），只係宜家冇咁明顯。」

劉溫馨指上台前心跳加速非常緊張，近期有玩瑜珈輪，可惜仍然減唔切，要靠節食，佢話：「兩日前只係飲水，噚日有食啲飯，今朝只係食咗兩隻雞蛋。」擁有C奶嘅范文雅透露十幾日冇食過飯，麵包亦係一日一個，佢笑指連男仔約食飯及朋友約宵夜都一律拒絕。

Vicky就靠運動操弗身型，佢話：「近排我開始玩冰水踩單車，放鬆咗肌肉再去打泰拳，攪到個人有啲虚脫，今日終於可以食嘢。」劉溫馨同范文雅即刻展露興奮笑容和應。

精選娛聞，喺晒《娛果》
http://fb.com/appledailyent