【有仇口】乜事咁㷫?火爆會長贏波毆打記者
錫永瑞士超足球Christian Constantin干斯坦天
【新增影片】
贏波都㷫到打人?瑞士球隊錫永會長最近無名火起,喺球隊2:1擊敗盧加諾場聯賽後,突然喺場內襲擊一名電視台記者,嚇親所有人。
呢次襲擊部份過程已被鏡頭拍低,段片一開始,就見到曾經係教練、家陣做緊瑞士電視台評述嘅芬加(Rolf Fringer)已經坐咗喺地下,之後就見到錫永會長干斯坦天(Christian Constantin),再走到佢面前掌摑佢一巴,然後手指指咁好似警告佢啲嘢,之後就離開咗。
據報干斯坦天之後接受其他電視台訪問,將成個過程再交代得清楚少少:「我趁佢唔為意,捉住佢之後由後面將佢踢跌。點解要咁做?當有人攻擊你,你就要識得自衛。」
兩人做咩事咁大仇口?原來芬加今周曾經喺節目中批評過佢,話佢完全冇會長嘅領導才能,由佢做會長簡直就荒謬,因此結下仇怨,但睇落似乎芬加講得幾啱,有乜咁大件事要喺大庭廣眾下郁手呢?瑞士足總已就今次事件開file,睇嚟呢位火爆會長受罰就肯定㗎喇,只係未知會幾重。