隔牆有耳:
呂麗君晒馬 「替天行道」 - 李八方

蘋果日報 2013/01/09 00:00


華置主席「大劉」劉鑾雄同南華足主羅傑承,涉以2,000萬賄賂澳門運輸工務司前司長歐文龍單案前日開審,兩人又成新聞人物,連劉氏家眷都係焦點。甘比同呂麗君輪流陪聲稱有糖尿病嘅大劉去福臨門,好頻撲㗎。
馬名霸氣嚇一跳
但身兼華置執董嘅呂麗君,似乎更加體貼噃。佢最近成功做馬主,新寵係嚟自愛爾蘭嘅4歲自購馬,喺外國贏過頭馬,交大摩馬房訓練;而呂麗君幫新馬改咗個好有霸氣嘅名,八方聽到都嘩一聲,就係「替天行道」!英文名則係Poetic Justice,比較正路。
馬主改馬名好考究,多數講意頭,而馬會批准馬匹改中文名一向好嚴格,立亂改名唔係咁易獲批准。例如馬名唔可以有商業廣告字眼,以免幫公司賣廣告,亦唔可以人身攻擊。而呂麗君隻新馬喺呢個敏感時刻,竟然改個咁語帶雙關嘅名,更獲順利通過,搞到馬圈中人都議論紛紛。
「替天行道」噚日朝早先試閘,未有耐出賽;呂麗君之後拉唔拉到頭馬?八方唔可以未卜先知,但相信有啲復仇味道嘅「替天行道」呢個名,應該幾啱大劉心水啩。而大劉過去大手筆買豪宅、私人飛機、遊艇、名畫等,但似乎對跑馬仔興趣不大,至今從未在港養馬,亦罕有現身馬場。
今晚跑馬地賽馬,羅傑承隻「軍事出擊」會上陣,跑重頭戲一月盃,贏唔贏今晚先知,但跑馬好偏門,好多時真係好邪。自從羅傑承官非纏身後,一直都未拉過頭馬,最近佢有份隻團體馬「競技英雄」,原本跑第一沖喜吓,點知贏咗卻因打茅波俾林大輝隻「太奇妙」告甩,食詐糊。

mailto:[email protected]