「2019國際中華小姐競選」今晚舉行，身為評判的馬德鐘及陳豪在賽前接受傳媒訪問，被問到評審佳麗時有何要求，馬德鐘說：「我對女性嘅審美觀，就係佢哋談吐要表現到佢嘅氣質，唔只淨係外表好靚，談吐個氣質係好重要。」

而陳豪就希望班佳麗要「女人得嚟又有啲男人」，他說：「要好夠女人，女人得嚟又有啲男人，即係……可以表現到自己囉，其實呢個title somehow係for個女仔，唔係話有特別嘅才藝呀，又唔係特別靚、又唔係特別身材好，而係揀一個係真係代表到呢個title嘅女仔出嚟，所以變咗我覺得係好多方面都覺得幾緊要。」

陳豪的太太陳茵媺為選美冠軍出身，問到他會否將自己的另一半的標準放入去？陳豪笑言：「少少啦，似Aimee就加半分啦！」馬德鐘亦附和說：「唔多唔少都有啲嘅，因為你自己揀得嗰個，你肯定係喜歡嗰個類型先吖嘛。」

不過兩人都說賽前未有看過佳麗的表現，馬德鐘表示：「我係特登唔睇嘅，一睇到啲報道就飛過，因為我唔想被任何報道影響，我想睇吓佢嘅現場表現，好乾淨咁去睇佢哋每一個喺今晚嘅表現。」而陳豪就指因為家中很少開電視，所以他都沒有機會看。

提到過去經常透過WhatsApp教唆網民自殺的怪女「Momo」，最近有指入侵到Facebook和YouTube等平台，陳豪表示有看過，他坦言覺得很騷擾，他說：「你試諗吓，當小朋友見到之後，嗰個影像就會留喺佢哋腦袋入面，呢啲恐畏，就會成日可以製造一啲嘢去嚇番自己，作為父母我哋固然擔心啦！所以我哋唔可以淨係畀佢哋自己去睇，要坐喺度陪住佢睇，同make sure佢哋睇啲乜嘢囉，呢樣都真係好緊要。」

提到陳豪的二仔陳浩鋒（Nathan）日前4歲生日，陳豪透露帶了他到主題公園玩樂慶祝，而且坐過山車。而陳豪亦贊成兒子學習，甚麼都要試，錯過就會學得再勁一點。

精選娛聞，喺晒《娛果》
http://fb.com/appledailyent

3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money！
http://bit.ly/2ICO2Mb

第二屆最港電影大獎投票網址
https://bit.ly/thekongestfilmawards2018