港中大戰門票瞬間售罄，好多媒體都將焦點放咗喺旺角球場門口排隊，不足1000張嘅優惠門票度。但係其實真正嘅賣飛重災區，係必須上Cityline買，只係剩返2,400張公開發售門票嘅正價飛。

不出所料，普遍嘅市民都係買唔到飛嘅。唔單止買唔到，好多人連入Cityline都長期處於「無法顯示網頁」狀態。綜合各大網民嘅意見，平均每人都撳F5鍵撳足兩個半至三個鐘，甚至連足總公佈賣晒飛果一刻，都係未入到去Cityline。唔止球迷，連港足主力陳偉豪同陳肇麒都喺自己Facebook表示買唔到飛。

似乎買到飛嘅人真係少之有少，唔少網民都猜測啲飛再一次落咗去黃牛黨度。有人就擔心啲飛畀愛國團體買晒，更有陰謀論認為足總唔想得罪中國，特登扣起晒啲飛畀國內球迷。至於一向唔係好識講嘢嘅足總主席梁孔德當然冇令大家失望，竟然接受電視訪問時話網上賣飛責任不在足總，今次賣飛冇進步空間，搞到成班失落嘅網民更加憤怒。阿梁主席，你今次又成功煽風點火喇！

買唔到飛已成定局，其實大家都有好多方法支持港隊。喺門票售罄冇幾耐，已經有唔同朋友話會搞港中大戰公開放映，等大家一齊坐定定支持港隊。而港隊其實今個星期六會主場友賽緬甸，下星期六主場對澳門，有心撐代表隊嘅不如入場支持下佢哋啦。講多句，其實港中大戰已經有黃牛價，盛惠1500人仔，至於助唔助長呢個歪風，你自己諗喇。