走咗個Stephy，小方話咁快就搵到千金超蓮做女友!?今日有周刊講小方同超蓮拍拖3個月，仲講到有好姊妹G.E.M.同李蘊拉紅線撮合，驚爆出「超力戀」……

《蘋果》搵過李蘊，佢大爆超蓮仍然係單身：「冇呀!佢o依家真係冇拍拖，我上個禮拜，佢返香港，我問佢，佢都話冇，佢一定唔會呃我!」講到佢係唔係真係做媒人，李蘊即話：「冇媒人呢件事，都冇拍拖，點會有媒人，何況我哋三個之中，我識小方最耐，所以真係假嘅!」

咁小方早前係唔係出席你囡囡個百日宴，乘機追超蓮，佢代小方解釋：「佢出席囡囡百日宴，係因為佢恭喜我，佢本身鍾意細路仔，佢都有出席黃長興囝囝個百日宴，所以唔係追女仔先去百日宴」

問到周刊影到小方為超蓮按摩條頸、掃背咁親熱，唔係有圖有真相咩，定係超蓮要低調，你哋好姊妹先幫口否認咋？李蘊直言：「咁佢哋都係單身㗎嘛，同埋佢哋，即係普通朋友都有機會做呢啲動作，所以唔覺得奇怪，唔會覺得過份親熱。」

真係信佢哋唔係拍拖，定係問過超蓮呀?李蘊就話：「唔信佢哋拍拖，而係呢個時間，佢(超蓮)真係唔想拍拖住，我未問佢，我上個禮拜先見完佢，佢先同我講佢冇拍拖，亦冇對象，唔想拍拖住，唔會一個禮拜無啦啦拍拖，何況係小方!」李蘊又指超蓮去尼泊爾係做義工，大家每晚都有喺群組傾偈，知道超蓮喺山區做義工係辛苦，每日都好攰，冇時間拍拖，有時間都拎嚟瞓覺，佢亦有啲戥超蓮唔抵：「人哋做義工，唔好將個焦點扭咗去男女感情上，同埋佢同小方係冇可能。」

李蘊強調小方同超蓮冇可能：「因為我知超蓮鍾意邊一type嘅男仔，所以係冇可能，唔好亂寫，同埋你哋唔信就放長雙眼睇，佢哋真係普通朋友，唔會係情侶，ok!」