馬浚偉(馬仔)、吳日言(Yan)今日喺金鐘出席由馬仔設計嘅陀飛輪手錶發佈活動，錶面用上徐志摩嘅兩部文學作品《偶然》及《再別康橋》節錄在內，馬仔接受訪問時話兩隻錶本只用咗一晚就完成設計，佢話：「正確嚟講我係用咗一個鐘頭，我當年會考唔合格唯獨設計係攞A，嗰陣有諗過入理工讀設計，可惜屋企唔夠錢要出嚟打工，估唔到咁多年後可以用番以前學過嘅嘢。」

講到佢嘅舞台劇《偶然徐志摩》將再度公演，馬仔話呢排已經忙緊排戲，今次有胡定欣新加入一齊演出：「定欣目前喺烏魯木齊拍緊嘢，月中先返嚟同我一齊排，佢都好忙拍完嘢返嚟又有好多訪問要做，但佢都陪我捱埋佢。」

同場嘅吳日言今日就同老公一齊現身，佢話近來忙緊籌備即將喺九月舉行嘅慈善馬拉松比賽：「因為舊年品牌有贊助，所以今年都嚟支持。」Yan話舊年第一次搞有三千人參加，希望今年會再進一步會有五千人。

問到今年會唔會親自落場跑？佢尷尷尬尬地話：「應該唔會，有啲唔方便。」講得咁神秘，係咪有喜？ Yan笑笑口話：「套用o依家最流行嘅佛系答案，就係緣分到大家自然會知。」差不多係默認有喜嘅Yan咁究竟鍾意男仔定女仔？佢話：「男女都冇所謂，我自己就梗係鍾意女仔啦，可以一齊扮靚，但老公就好似鍾意男仔多啲，因為佢好好動，但男女都冇所謂，始終係開心事。」咁近來身體有冇唔舒服？佢話：「還好，冇乜特別唔舒服，都係一般啦。」

精選娛聞，喺晒《娛果》
http://fb.com/appledailyent