每次聽到麥兜唱嘅呢首兒歌:「噢!聖誕樹,托它歸家,我呀媽話幾貴㗎!噢!聖誕樹托它歸家,放喺廳度閃閃吓!」八方都好想買棵聖誕樹返屋企擺吓,增加氣氛。
今年旅發局搵到贊助,再放置聖誕樹喺中環皇后像廣場,呢棵樹好難托返屋企,皆因有成30米高,不過翻查資料,原來前年棵樹有成35米高㗎,今年矮咗一截,影相應該唔覺啩!聖誕樹縮水,唔知同通脹百物騰貴有冇關,希望唔係有人「打斧頭」啦。
贊助商置地唔肯講畀咗幾多錢,咁嘅時勢肯科水贊助都算好㗎喇。田少透露一年前已想揼置地心口,「棵樹咁近文華東方酒店、置地廣場,對佢哋都有幫助㗎。」