【信里一城】內地貪官出貨實錄（小師兄）
蘋果日報 2020/06/10 15:00
小師兄信里一城
曾經有位大陸客搵我，帶我上他那個無敵維港景的老闆房，茶煙酒樣樣齊，話聽講我有兩台客在手，話有批貨放暗盤，有錢齊齊搵喎。一睇，嘩！總值超過9個零，開價竟然低市價3成，發達？發夢無咁早。這批貨是黨的，中間人講明，這單交易，A內地官員要收1億元，B中介公司要收4,000萬元，還有一大堆艇仔、駁腳以至𢺳車邊的外賣仔都要分一杯羹。總之，假設成交價15億元，額外要支付1.5億元給一班「中介人」，難怪低市價3成，原來1成是給一班貪官的。
換言之，這批貨9折。雖低市價兩成，但大拿拿要買家額外支付數以億元走後門，並且要證明自己銀行戶口最少5億元流動資金，上市公司不用搵，沒上市、又拿得出超過10億元買貨的買家在香港市場屈指可數。然而，當時市場上竟有超過1名買家有興趣，可能想換來「愛國商人」的崇高地位。
談判條件好辣，買家雖然可以透過律師北上見黨，但需要帶超過億元現鈔北上落定，這是荒誕兼不可能的任務。需要接見的官員及部門，最記得有國務院國家資產監督委員會，還有乜乜專案委員會，這些乜委乜會，多到寫滿兩版紙。最重要業主不會比佣金經紀，買家畀完後門錢，還要再支付成交價的1%給所有中間人，包括經紀，如我。由於牽涉太多不知名人士，又不能出公司數，邊有老闆敢冒險呢！所以這批貨，當時諗，邊個賣得出，我批個頭畀佢當凳坐。
結果暗盤放售數月後，整批貨淪為銀主盤，收回這批貨的銀行雖然不是國有銀行，卻與黨份屬友好。那批貪官其實一早知道這批貨斷供多時，遲早會被債主銀行收回，所以試圖在淪為銀主盤前夕沽出，並從中「撈油水」。