內地傳媒最近報道，有唔少女仔為咗做空姐，不惜畀逾10萬元人民幣介紹費中介人；喺香港，空姐亦係受歡迎行業，每次航空公司公開招募，隨時有過千人見工。空姐夢不易圓，香港唔興走後門，增加勝算就要諗其他方法，有機構最近開班招生，請資深空姐現身說法，教授面試秘訣。

答題勿擔天望地

呢個空姐培訓班嘅導師，係入行14年嘅阿姐級空姐Michelle。佢同八方講，空姐入職後有基本訓練，因此呢個course唔會教急救、自衞等技能，而係講面試貼士，第一戒條係忌浮誇，Michelle話最緊要儀容整齊，着suit束髮呢啲係基本嘢，唔使多講。
做空姐唔係選港姐，Michelle見過嘅失敗例子，包括眼蓋搽閃粉、戴假睫毛、着背心裙、喱士黑絲襪等，總之靚女們唔好以為樣靚就surewin，Michelle敬告各位，殘酷嘅現實係，面試官好多時都係空姐阿頭，佢哋都有妒忌心，一啲行出嚟就吸引無數麻甩佬目光嘅美女，往往都會死得不明不白。
所以談吐態度比樣貌重要，Michelle話，面試中嘅對答環節，答案內容唔重要，考官係睇你講嘢時候嘅態度。好多港女講嘢時擔天望地，呢樣嘢要戒，無論考官幾樣衰都好，你都要同佢有eyecontact。應徵者亦要避免答得太長，有啲人會做足準備長篇大論自我介紹，咁樣只會畀人over嘅感覺。
自信心固然重要，但係又唔可以爆棚喎。舉例講，空姐面試通常都有小組討論環節，Michelle話，有啲應徵者鍾意突出自己，一味搶答；冇錯，咁樣做係可以展示對工作嘅熱誠，但係隨時弄巧反拙，畀面試官一種缺乏團隊精神嘅印象。

飛行壽命唔會長

八方今日教曉大家咁多空姐面試秘技，各位港女唔使多謝我。事關呢，即使能突圍而出，他朝當上空姐，仲有漫漫長路嘅挑戰。Michelle形容自己嘅空中生涯風平浪靜，但係都先後遇過下列事件：一個醉漢行去洗手間期間突然仆低，需要急救；一個男乘客無聊搭訕，滔滔不絕撩佢傾偈；一個旅客投訴點解冇牛肉食，點樣解釋都冇用，最後被佢寫意見書投訴。
九霄之上，乘客最享受嘅就係食飛機餐，呢個就係空姐最體力透支嘅時候。Michelle話，唔好睇小簡單嘅派餐動作，又要彎腰又要踎低又要推車，動作重複又重複，條腰好易勞損。講起勞損，好多空姐做到40歲就要開始為退休作打算。Michelle話空姐飛行壽命唔會好長，所以好多空姐都喺花樣年華就收山，Michelle好謙咁話自己冇福份嫁入豪門，家嘅心願就係導人升空，做個空姐導師。

mailto:[email protected]