【李八方online】警總殘局無將帥 棋子POPO注定淪棄卒
蘋果日報 2019/12/17 00:06
象棋李八方ONLINE棋子
PK鄧上場成為POPO之首後，即刻改咗警隊句服務口號做「忠誠勇毅 心繫社會」，將社團堂口名同執法部門正式connect。最近警隊又有新搞作，嫌浪費9.5億公帑出OT錢仲未夠，仲走去將警總個大堂加裝飾！網上瘋傳一張相，相入面見到電梯大堂變成一個巨型中國象棋棋盤，而「忠誠勇毅 心繫社會」句新口號就代入8隻象棋，慌死一眾出入POPO睇唔到咁。
家陣警察總部生人勿近，一般人唔會有機會行入去，所以有理由相信呢個宣傳並唔係針對公眾而係POPO內部，但八方再睇真啲，就發現玄機處處，除咗因為警察會日日喺個棋盤上行來行去，俾人覺得暗喻警察就係棋子之外，喺電梯門之前，就有條「楚河漢界」，唔通POPO係想話自己同個社會已經切割咗？再細心睇落去，仲發現當電梯門打開，POPO就會好似一隻卒仔咁走出嚟，諗住打橫行，但實情一過河就會死囉，咁仲唔係注定做棄卒？
如果POPO覺得自己係「忠誠勇毅」，咁對家現時又有咩棋呢？論棋數就肯定少一隻，因為八方只係見到有炮、有馬、有士，但就冇咗將帥，似捉緊殘局一樣！咁究竟POPO係想話自己已經捉完盤棋，定其實佢哋心知肚明，對家即係今次場群眾運動，根本係冇大台冇領袖？如果仲想當象棋咁捉，肯定輸梗。八方問過PPRB，仲等緊佢哋回應。
警總電梯大堂裝飾成一個巨型中國象棋棋盤，莫非暗示Popo係棋子，遲吓會變棄卒？