香港各間大學因政府cut資源而鬧哄哄，最老牌嘅香港大學暫時唔理呢啲風風雨雨，聽日喺詩情畫意嘅荷花池旁有個追憶昔日光輝嘅盛會，為孫中山先生個銅像揭幕，擇十一月十二日呢個日子，因為係國父生忌。
國父與港大淵源極深，係港大前身香港西醫書院首屆畢業生，一九二三年喺港大公開演說，就形容過香港同港大係佢「知識誕生之地」。呢啲故事相信好多人知道，為紀念孫中山先生與港大嘅親密關係，港大特別由建築系教授龍炳頤領導工作小組，邀請北京中央美術學院司徒兆光造像，鑄造咗呢個高六呎、重一噸嘅銅像，過程唔簡單，總共歷時三年先完工。
司徒兆光雖然唔係港大舊生，但係祖籍廣東開平，喺香港出生，兒時喺香港生活，就住喺港大隔籬，每日經過港大，留低唔少記憶，由佢鑄造銅像算係不二之選。
（圖）高六呎、重一噸嘅孫中山先生銅像，會放喺港大校園嘅荷花池旁。



傳真︰2623-9278
電郵︰[email protected]