林敏驄嘅《今天星閃閃35年時日如飛林敏驄腦交戰作品展演唱會》，喺噚晚就完滿結束，不過喺前日就發生意外，台中央嘅圓形升降台塌下，令到有dancers受傷。

喺噚完演唱會完咗之後，後台祝捷會司儀話：「嗰個兩dancers已經好轉，過一、兩日可以出院，祝早日康復。」

到咗林敏驄接受訪問嘅時候，佢就話終於鬆一口氣：「好開心完成咗個騷。第一晚發生事時，大家都會有啲諗住或諗番嗰件事會分咗心，但好彩第一晚反應已經好正。今晚特別正啦。」今晚係祝捷會上，阿驄講笑話開part2，係咪講真呢？佢就話：「有期咪開囉，我冇所謂。」開林鄭（中基）定part2先？佢話：「你聽條友講，我真係有叫田雞入紙，總之兩樣都可以做，冇所謂。」

問到塌台會唔會美中不足？佢話：「反而今大家更團結，自己真係好心痛，個個為撐我搞到咁。好似伊健、基仔排晒舞，唔通自己跳咩，自己喺台上面跳好戇居，好似出醜咁，所以出事嗰時，佢哋問我仲做唔做，好彩每位都好專業，難免少少分心，但都做得好好。」

問候阿智傷勢？阿驄話：「今日有見林珊珊錄咗voice mail畀佢，講真阿智有咩事我點賠？（點答謝？）在心中啦！佢地都係二話不說答應，全部都係朋友。」剛才感解落淚？佢話：「真係好感觸，真係覺得好心痛，大家為我仲要咁頂落去。」

阿驄又話真係好感觸：「因為真係覺得好心痛嘅，大家為咗我仲要咁樣頂落去，dancer嗰度，慰問就一定會有嘅，其他嘢再睇吓點樣啦。」保險方面，阿驄話：「行政嘅嘢真係唔知道，如果噚日早啲嘅話，咁啱就係我同古巨基綵排，仲要喺個圓台上升高成8呎，咁我哋仲要一人企一邊，當時已經覺得有少少搖，到後尾入番去化妝間時，聽到出咗事我都呆一呆。」

提到前晚同噚晚都超咗少少時，係咪兩晚都要罰錢？阿驄話：「今晚係開心嘅罰，但係有啲位本應我唔使出嚟都出，好似杜麗莎嗰一part屈咗佢唱首英文歌；Shirley（關淑怡）嗰度，我覺得應該畀啲鼓勵同正能量佢，結果佢都唱得好好囉！」咁前晚係咪要罰好多錢？阿驄話：「噚日（指前日）監製有喺耳機度話仲有5分鐘就要罰好多，問我博唔博？咁我嗱嗱聲唱埋首歌，最終都冇辦法喇，唱唔晒，我個人就要落台囉，但音樂未cut，唯有喺台下繼續唱。」

再講到譚詠麟冇嚟到會唔會有啲遺憾？阿驄話：「其實本來阿倫就話8號得嘅，慧嫻嗰啲又要喺廣州開騷，不過冇所謂啦，歌影視我全部都識嘅朋友，但今晚其實都好似開party咁唧，或者part 2時大家又會得閒呢！」

講到做咩當住苟姑娘男友面前抽水？仲話要幫人做體檢？「笑言：搵日啦，搵日幫佢做體檢（人哋男友睇住唔驚咩？）就係男友睇住先唔驚吖嘛！」

身為投資者兼製作公司嘅黎瑞恩喺騷後受訪時話，對於今次發生冧台事件，佢覺得既然咁大件事都遇過，以後再遇困難都一定過到。被問到今次會唔會要蝕錢，因為超時及冧台等，小恩子話因為兩場騷都幾乎full house，所以只係「賺少啲啫」。而且佢話今次為咗林敏驄個騷開公司，為佢帶嚟好多商機，分別有人聯絡佢搞演唱會、舞台劇嗰啲，但佢就要諗清楚先決定係咪搞。