第五場四班1600米，「愛歡笑」上季四月後再無上陣，今季卻可一早復課，自八月中開始快跳程序，九月試兩課大閘，直到埋門搡都無間斷，弱馬受操下，狀態越磨越弗，好耐無見過可以咁好！想博的原因是除狀態見好外，還有三落四班與初戴眼罩的兩個變數，九月兩課閘都有戴眼罩試，最驚喜是都無甩晒轆般墜後，有眼罩主動性大增，相信對落場會起到正面作用，跑番九成，無馬夠佢跑！
「君悅灣」上場應放又唔放，有嚴重內閃傾向，直路無欄已跑低啲，再加上田泰安最後200跌埋鞭，結果僅輸。今次換羅理雅，睇過周三表現，其右手鞭夠晒勁，應該搞得掂，再計同場無乜快馬，若果肯搶欄領放則更加好。「人強馬勁」上次直路塞死無跑過，開過氣再跑同程更有把握。「千杯豪情」操練程序完整，應是配合今日馬房攻勢的一員，不過，秤實力卻稍不及上述三駒，靠狀態弗、好檔幫助。
「百年歡」上次跑贏「君悅灣」，同程跑三次都入Q，其實都有條件，只是排11檔兼配巫斯義，怕會順其自然走外叠。「勝利雄心」狀態好而實力稍次，要博對手失準才有機會。「神朗」上場水準不高。「進攻足球」復課不覺再進。「樂趣」身型總不夠壯。「龍之欣」狀態未返到上季贏馬水平。「常開心」14檔難度大增。「揚威香江」受傷患影響，戰鬥力銳減。「電訊太子」連續兩場確認未跑得番。「有運」欠成熟。