王菲今晚為《幻樂一場》演唱會舉行嘅記者會，阿菲為咗呢場記者會，專登簽咗400張親筆簽名相畀大家，真係好有心，阿菲喺8點20分左右出瑒，着住一條藍色長裙，身形keep得好好，喺台上仲有好多唔同嘅表情，心情大好，一出現就同大家揮手，仲用國語同大家講你好，司儀就賣口乖，讚阿菲係唯一嘅女神，因為得佢係唯一一個女神可以吸引人為佢影相。

講到阿菲嘅演唱會名《幻樂一場》，個「樂」字係玩樂個「樂」，定係音樂個「樂」，阿菲就話邊個樂都冇所謂，因為想做一個如夢似幻嘅演唱會，司儀問阿菲今次會唱幾多首歌，因為喺台上見到阿菲嘅時間都唔多，阿菲就話：「不是時間長度去衡量一個演唱會，剛好的時間就最好，和一般的演唱會一樣，都是20多首。」

阿菲又話會唱啲自己想唱、之前冇唱過嘅歌，不過都會唱啲觀眾想聽嘅歌，所以會一半一半，今次張亞東會做音樂監制，阿菲又話：「他的感覺很夢幻，跟這次演唱會的風格很像。」

12月30演唱會就會開始，阿菲話係想試下用直播，所以只開一場，想全世界嘅fans都可以一齊睇到，阿菲講到中間仲唔記得自己講咩，拍咗一拍自己個頭，其實係想講VR嘅新技術。仲話今次嘅要記好多對白：「這次話太多。」大合照嘅時候，有個祝酒儀式，阿菲仲一口飲晒佢杯香檳。