小妹最鍾意用新科技，香港仲未有蘋果iPad行貨賣，但我已經率先喺尖沙嘴嘅香港洲際酒店免費試用過。我同朋友上星期入去酒店住咗兩晚，發現佢哋最近一口氣入咗八部iPad，其中五部放喺行政貴賓廊，住客可以一邊食住小食甜品、飲吓茶，一邊試用呢部高科技產品。
經酒店WiFi用iPad上網好順暢，雖然畫面有至少五部iPhone咁大，但係用手輕觸式控制完全無難度，放大縮細畫面好自如，一睇片就感受到同iPhone嘅分別，畫面大好多，好似睇電視咁過癮。

網上地圖見到景點環境

另外三部iPad放咗喺酒店地下大堂個禮賓部，住客臨出門口，想知天氣、有邊度有好嘢食同玩，職員都會透過iPad講解，一齊睇住個網上地圖，靠「香港720度」呢個應用程式，要去嘅景點四周環境全方位見到晒，實唔會去錯啦。酒店個禮賓司白樂易同我講，以前淨係可以喺地圖圈住個位置，畀啲單張個住客，有時住客未必識去，家通常都冇問題。佢仲話日後有可能將iPad放喺房畀住客用，不過點確保個客唔會拎走呢？
本港居民平時要住雙人海景房加埋用行政貴賓廊設施，要4,000蚊以上，酒店下個月4號起推出優惠，3,290元就可以好似小妹咁試用iPad。

電郵：mailto:[email protected]