近日外圍消息反反覆覆，歐洲央行突然宣佈減息都算關鍵。德拉吉上任歐洲央行行長即刻放寬貨幣政策，話唔定印埋銀紙救市，你點估？
港股以大波幅進入觀察期，以圖論勢，恒指8月初至今已形成頭肩底，頸線暫企20200，能否強勢突破兼企穩，要睇歐洲或中國有冇大規模放水動作，如果唔放，歐債危機由希臘燒到意大利，到時講乜都嘥氣。
晉佳上周五推介過航空股之後，剩番走勢靚仔啲嘅人仔升值概念股，就有石化股，當日中石化（386）跑出，但呢隻股慣例只炒1日，跟住就派貨，無謂博佢玩突破，一於放生佢。

博升一成睇2.2元

過往中石化單日急升嘅話，儀征化纖（1033）通常都會跟。雖然中石化通常炒1日就收工，但儀征喺中石化高位派貨嗰兩日，通常仲有得升，問題係升多定少。以舊年10月13日中石化勁升日為例，儀征之後兩日大升三成。當然，家市況唔同，儀征又冇Re-rate古仔，但要兩日博升一成上番2.20元，都仲有啲機，如果個市就，可以睇8月高位2.35元，暫時睇跌穿20日線1.77元止蝕。
儀征係內地主要聚酯生產商，產品價格上落方向會跟棉價，油價成本影響亦頗大。公司第三季純利下跌22%至2.72億元人民幣，每股盈利6.8分，首三季每股盈利20分。儀征末季嘅經營環境，唔會比第三季好，因為棉價同油價會通常同步，但近期油價由每桶75美元反彈到95美元，棉價仲響低位郁都唔郁，嚟緊就知儀征利潤率好有機會受壓，首三季嘅高盈利唔易Keep，就係咁先有Cheap價畀你買。
不過，儀征預測2011年市賬率僅0.68倍，行業經過多年淘汰，已經唔再係供過於求，未來收入同盈利會跟住周期上落，唔再一路低沉下去。就咁睇，估值算係抵，唔短炒，長線都要備忘一下。
上周五推介嘅東航（670）跟大市升，但勢頭未算勁，升幅竟然落過其餘兩隻航空股。持貨者如見今明兩日股價冇進展，可先行沽出食糊，當炒少隻，跌幅多過上周高低位嘅黃金比率0.618倍，即跌穿3元就止蝕，目標仍睇3.50元。
晉佳
本欄逢周一、三及五刊出