維園六四集會雖被禁止，但仍無阻市民以自己的方式悼念六四。商人周小龍旗下的童裝品牌Chickeeduck天后店及荃灣店前日（2日）起向市民派發蠟燭，鼓勵市民將燭光帶到全港各處。天后店今日起更派發本地藝術家黃國才近年在六四悼念集會中收集的舊蠟燭，店舗於晚上8時更關燈悼念10分鐘。有市民專程到店舖領取蠟燭，指會「一如既往做返以前會做嘅嘢」，又稱政權越打壓集會，市民越應悼念六四。

六四事件期間正就讀中學的林先生指，當年看着電視直播感到很大衝擊，又指「以我所知嘅唔係官方而家講嘅版本」。他指早年曾出席過5、6次六四集會，近年心態「懶咗」故未有再出席，但他現時認為有必要再出來悼念，「佢越禁止，我就越想出嚟行吓、悼念吓，如果個個都唔出嚟， 十年八年後就可能冇人知道呢件事」。

訪問期間，有警員前來要求記者及林先生遵守社交距離，記者強調當時合共只有三人進行訪問。林先生見狀稱，「感覺好似返咗內地咁，香港呢兩年都好似內地社會，趁而家仲有得出嚟行街、買吓嘢就出嚟行，過多兩年可能冇呢啲舖頭」。

20多歲的陳先生（化名）指，他從16歲開始出席六四集會，後來在外地求學期間未能出席，但2017年回港後都有出席集會。他亦是專程到店舖領取蠟燭，稱打算稍後「搵個方便自己嘅地方，一如既往係做返以前會做嘅嘢」。

陳認為悼念是很基本的事，「如果我哋自己都唔做，有好多嘢唔講就好似唔存在，有好多歷史都係有人用第二個story skin off」。他又稱，如果有空間就應該繼續悼念，令大家知道和記得六四事件真真正正發生過，同時要向所有人表示香港人未有遺忘。

對於警方禁止六四晚集會，陳先生感到十分諷刺，認為此舉更提醒大眾六四集會的重要性，「正正係因為佢哋做咁多嘢避免人出現喺呢個悼念儀式，更加提醒大家呢件事係確確切切地存在」。身穿黑衣的他預計，被警察截查是「必然會發生」，但他仍稱不應感到憂慮，反問「如果連着咩衫嘅權利都冇，仲可以點？」

而在該店購物後領取一盒6支蠟燭的林先生表示，自己會找合適的地方燃點燭光，如同路人有需要，會向其他人派發多餘的蠟燭。

到晚上８時，店舖關燈10分鐘，有客人在店內開着手機燈，亦有人在手機開着燭光相片，燈光重開後隨即有人拍手。

其間一名自稱香港人的女士一直手持手機，屏幕顯示燭光相片，她稱十分感謝周小龍於現時飽受打壓的時勢仍勇於站出來，故專程到場消費，希望給予對方支持、互相集氣。

她稱過往只要身在香港都會出席集會，今年只能在店內默哀悼念，感受非常不同，「以前你可以安心地喺維園悼念，而家只可屈喺咁狹窄嘅空間，越嚟越感到被打壓」。

她稱六四事件32年來已種在港人心中，「呢件事一日未平反，仍想做得幾多得幾多」，說時一度眼泛淚光。她批評當局禁止集會是政治打壓，「咁簡單舉動（悼念）對國家安全有咩影響呢？要令大家噤聲？」她又表示，希望港人齊心表達對平反六四的堅持，同時要堅持免於恐懼的自由，稱「如果更多人咁做，就多啲希望」。

老闆周小龍晚上到場巡視，他稱客人對派蠟燭反應非常好，兩間分店已接近派完800支蠟燭。他稱部份蠟燭是本地藝術家黃國才多年來在維園六四集會收集的舊蠟燭，周希望幫忙派發給市民，讓市民今年可以「將維園帶返屋企」。

周續稱，六四是歷史上很重要的事件，港人及中國人一定要支持平反六四，「真相未講出嚟，政權未道歉，負責的人未問責，我哋都唔可以忘記六四，應該世世代代傳承落去」。

店舖外全晚不時有警員巡邏，周小龍形容警方今日的佈防儼如「反恐演習」，又提到警方下午開始於3條過海隧道架設路障，批評是浪費警力、小題大做，「都禁咗集會，成日要搞到咁大件事，根本係出咗7,000警力，幫我哋悼念六四，要多謝香港警察」。他亦向記者笑稱店舖非常安全，「你後面（記者身後有數名警員）好多人保護我哋」。

-----------------------------

蘋果App大升級 更簡潔更就手！了解更多（立即下載體驗）