熱愛打籃球嘅劉穎鏇(Tiffany)噚晚喺中環為運動服品牌FALKE擔任剪綵嘉賓，平時習慣著緊身運動服跑步打波，今次接觸咗呢個品牌輕便運動服後，感覺完全不同，令佢有多一個選擇。

近日不時喺IG分享早前拍攝旅遊節目相片，佢都好希望有機會繼續拍，因為拍旅遊節目一定係去當地最出名、好玩地方，同埋食最好食嘅，講到若果要食昆蟲可以接受嗎？佢話：「之前喺節目食過一件啫喱，原來裏面包住隻蟲，我仲以為係普通啫喱，但我本身就好怕蟲，好多人話我牛高馬大唔駛怕，但我見到都唔得。」

似乎拍攝團隊愛上劉穎鏇喺鏡頭前驚青樣，不時安排佢挑戰刺激機動遊戲，佢話:「我唔係畏高，我只係驚離心力，以前我唔玩機動遊戲，不過之前拍過兩個節目，又玩過山車同跳樓機，已經過晒我人生嘅底線。」問到寧願玩機動遊戲定泳衣出鏡？佢話:「如果要著泳衣出嚟，自己唔係咁鍾意，選港姐嘅時候要著泳衣出嚟自己都唔係好舒服，可能自己個人比較保守，所以如果要用兩者去揀，都真係好難揀。」

精選娛聞，喺晒《娛果》
http://fb.com/appledailyent