舒淇早排同老公馮德倫，宣傳新戲《俠盜聯盟》嗰陣，難得可以日日對住，不過套戲上咗畫，兩公婆睇怕又要做空中飛人，要見面都要夾吓時間。

老公唔喺身邊，舒淇今日下晝約4點，就搵咗經理人同助手陪遊中環名店，期間舒淇入咗Armani，喺店內逗留約半個鐘，再現身時，手上已揸住杯熱咖啡，舒淇仲好滋陰咁吹吹杯咖啡先飲，沿途佢都有笑容，心情似乎唔錯咁。

縱使佢今日打扮一如以往，都係cap帽、黑超、灰色拉鏈外套再加闊腳牛仔褲，不過星味極濃嘅佢，吸引到嘅回頭率好高。

期間，眼利嘅舒淇發現記者，極速返入Armani店內，隔咗一陣，舒淇與同行嘅人，就急步離開店舖，再沿電梯直落，然後坐泊喺門口嘅七人車離開。