當年今日
關於我們

【新城勁爆】連擸四大獎G.E.M.自爆:其實我今年冇歌

蘋果日報 2014/12/27 06:00

澳門蘋果會展頒獎禮祖兒直升機新城即時勁爆衝出宇宙銳哥冇歌

「衝出宇宙」嘅G.E.M.,可能真係慣咗(安排自己)做壓軸,噚晚去澳門開騷,夜麻麻八點幾先至話坐直升機返港出席喺會展舉行嘅新城勁爆頒獎禮。點知最後飛唔成要改坐船,佢本人話冇遲到,但個騷明顯overrun,仲要啲得獎歌手清唱,表面就話晒唱功,實質都係拖時間。事關當日大會都係諗住俾得獎者唱30秒,點解到近尾聲頒大獎前要「dum」波鐘?你懂的。

估唔到,G.E.M.遲開有條路,就連慶功都遲足四十五分鐘,就連撐佢嘅謝安琪、同奪四獎嘅許志安都到晒,G.E.M.芳蹤沓然。等到大家做晒訪問,0145a.m.,G.E.M.先至到。

問佢可覺得冇得坐直升機返港是否有降呢之感?G.E.M.就話:「都……幸運地有船可以返到嚟……」仲話自己趕到十點船係好幸運喎。

之前有傳就話因為祖兒嚟唔到而令G.E.M.可以捧走四個獎,G.E.M.話:‧「我覺得又唔好話去定義咗獎嘅嘅嘅嗰個背後嘅定義係乜嘢。其實Joey同Eason都係我中學時代成日都聽嘅,俾我好多音樂上面嘅影響,咁所以喺佢哋以前攞咗好多獎嘅時候,代表咗佢哋好多努力囉。無論我攞定其他人攞呢啲獎都好,我覺得都係有好多努力喺入面,無論邊個攞都好,我都會好尊重同肯定。」

聽完G.E.M.嗰句「唔好話去定義咗獎嘅嘅嘅嗰個背後嘅定義係乜嘢」,似乎唔係好明,聽埋呢part,就明。事緣傳媒問G.E.M.之後會否出席其餘三個頒獎禮?佢深呼吸一口氣,話:「其實我今年呢,係無歌…0架。哈。其實今日……我都幾……意外,因為受到邀請嚟到,因為我今年比較多時間比賽,參加《我是歌手》,之後就忙做巡迴,咁所以,其實今日係一個bonus,其他頒獎禮我唔敢諗。」是否清晰晒?

但係G.E.M.都係冇正面回應番,盛傳因為祖兒唔到先至令佢有獎攞?G.E.M.終於忍唔住:「呢個你要問銳哥(朱明銳)喇,我真係唔知呀!」連尷尬咁,笑咗幾下。

咁如果係真,點算?G.E.M.又尷尬笑謂:「咁我哋呢啲後輩,仲一路慢慢成長緊0架嘛,咁所以,保持一個學習嘅心。」