陳家樂跟余香凝4年情玩完，有指係余香凝同保險才俊Victor來往甚密，導致分手收場，不過男未婚女未嫁，大家都有選擇權，真係好難為愛情定分界。余香凝今午3點見傳媒，承認為咗開舖事宜而到過Victor家中開會留宿，亦無意消費陳家樂。

飽受分手新聞困擾嘅家樂今日寄情工作，晚上接近7點，佢戴住口罩、穿上黑色運動外套，一臉憔悴亮相旺角，準備為電影《速戰》上樓開工。

到接近8時，家樂換過戲服，相手合十落樓接受傳媒訪問。有記者問到佢心情有冇有改善，佢依然一臉哀傷，家樂只係話：「今日要拍戲，唔想回應太多。希望畀多啲空間我去處理呢件事，唔想影響劇組拍攝。」家樂話作為專業員亦係工作一部份，會平伏心情去拍戲，問到係咪如余香凝所講分手一個月時，佢話：「係分咗手，希望畀啲空間我哋，處理自己工作先。」

之後家樂行到西洋菜街南準備拍攝，見佢其間不時以手捽鼻掩面，且雙眼通紅，有記者問到佢係咪想喊時，佢雙眼顯得更加紅腫。現場預備咗5輛跑車，家樂跳上第一部嘅GTR開工。劇情講述家樂開住跑車到現場，佢一落車在場人士即歡呼。

另外，家樂雖然情路失意，不過事業發展就有聲有色。除咗《速》片，早前佢參加演出陳友導演嘅電影《兄弟班》，故仔講述樂隊溫拿一路走來嘅兄弟情，戲入面佢飾演彭健新。而《兄》片近日入圍第17屆「紐約亞洲電影節」(New York Asian Film Festival)，有機會角逐「觀眾票選大獎」(Audience Award)。

精選娛聞，喺晒《娛果》
http://fb.com/appledailyent