呢幾年政府或者公營機構搞宣傳，少不免要搵名人做主角，借助佢哋嘅名氣吸引人睇同share，好似民政事務局就搵「牛下女車神」李慧詩（Sarah）拍片，宣傳香港體育運動，積金局就搵𠵱家變成大隻仔嘅陳奐仁（Hanjin），化身「爆肌男神」推廣管理MPF。
Sarah係民政條片入面分享佢對體育運動嘅睇法，佢話體育運動其實係一種身與心靈嘅融合，尤其係為一個城市打氣嘅好方法，因為凝聚到嘅大眾力量，喺其他場合好難搵到，又自爆好細個就跟媽媽每日做半粒鐘早操，都係鬆吓筋骨，當時覺得好容易、冇乜用，但大個咗就知道，咪睇小呢啲早操，其實有助鍛煉協調性，Sarah表明支持運動普及化，希望全城知道體育運動有乜好。咁如果可以畀佢揀一份政府工，佢會做啲乜？佢笑笑口話：「好希望做到體育專員，對體育有啲貢獻」，繼而仲主動𢱑，「希望第時請我啦！」

陳奐仁瞓身宣傳積金局

民政有「牛下女車神」，積金局用Hanjin拍《積金特工隊》短片都唔弱，據知Hanjin喺3輯短片中瞓身演出，飛車、易容兼深入險境，咁賣命無非都係要破解因為「唔知、唔明、唔識」所產生嘅退休投資迷思，同時hardsell積金局嘅網上工具──「退休策劃計算機」及「基金表現平台」。呢條短片周四（26日）起會喺積金局《全積特攻》facebook專頁同不同網上平台推出，大家可以睇睇呢位「爆肌男神」幫唔幫到大家嘞。

李八方