自比一粒瘜肉可能好快被民建聯切割嘅鍾樹根，呢期紅爆全城喎，八方就「跟紅頂白」問佢攞啲童年照嚟想當年，睇下少年Tree根係點嘅樣，點知Tree根只有出嚟做嘢後嘅經典工作相片，唔係咁孤寒，唔畀人睇吓佢那些年賣相啩？

家藏幾百部相機

59歲嘅Tree根對此大聲呼冤，解釋自幼家貧，所以細路哥嘅生活照少之又少，最慘有年搬屋唔見咗成批舊相，雖然童年Tree根冇乜留影，但佢話細細個已經迷上攝影，因屋企窮到連相機都冇部，惟有向朋友仔、書友仔借嚟過吓手癮，出咗嚟做嘢，搵到錢咪買相機慰勞自己，多年來買咗幾百部相機喺屋企。
而從政後佢就話同事幫佢影咗好多，其中一張係1991年曾與一班東區區議員同時任港督衛奕信爵士伉儷行山，只見當時卅零歲嘅佢，朝氣勃勃喎，個肚腩仔仲好出眾㖭！睇番啲工作照，Tree根多年嚟，不論髮型、身形同表情都冇乜點變，可以肯肯定佢一直好享受從政；港島區有阿爺撐嘅建制派，睇路嘞！