一班由星爺捧紅嘅藝人李健仁（如花）、黃一山（細龜）、鄭文輝同楊能等，最近接咗ViuTV嘅遊戲節目《街頭派錢黨》，今日佢哋喺觀塘拍攝。

好耐冇見嘅如花，近十年都喺大陸發展，佢話當年由唔識普通話，到o依家可以流利咁應對，又話感激星爺，因為拍咗佢嘅戲令到一班演員到o依家都可以喺大陸生存到。

佢話：「因為佢嘅戲喺內地經常重播，師傅又好老闆又好，多謝佢創作角色令觀眾認識我哋。」如花喺大陸有好多拍攝機會，男、女角色都照做，不過指明要演如花呢個角色就會double酬勞，佢仲話啲人仲會叫佢李健仁嘅普通話做「李賤人」，問佢介唔介意？如花就話：「個名畀人記得永遠唔介意，多謝佢哋。」

另外，同樣喺大陸展嘅細龜，就以拍網絡電影為主，單單舊年已經拍咗40部，平均1個月拍3至5部，佢話：「好開心呀，年紀大，o依家嘅細龜進入咗另一階段，嚟緊會拍肥仔聰嘅《喜劇之星》，同林雪、小龍、家英哥合作，希望好笑，當同啲老朋友聚會，o依家人生倒數，過得1日得1日。」