入行10年嘅衛詩雅，2017年係佢嘅豐收年，整年拍攝兼上映嘅電影一有共11部，電影一齣接一齣，喺演戲事業上略有成績。今年喺電影《失眠》中一人分飾兩角，被虐、被性侵，角色盡現孤癖崩潰，喺演技上備受讚賞，詩雅仲話如果憑此角色入圍提名來屆金像獎，算係給予自己演技進步嘅肯定，而詩雅一向視偶像劉青雲作為終生目標，奈何公認好戲嘅青雲，提名8屆金像獎才初嚐影帝滋味，提名16次才奪兩次最佳男主角獎項，詩雅揚言：「有提名都算贏咗，要比青雲更有恆心同韌力，專心磨練演技。」

17年拍咗5齣電影，連上映共11部戲嘅衛詩雅，對於豐收成績感到高興，佢話：「做到自己最想做嘅嘢，可以做到唔同角色，享受戲接戲嘅感覺。之前冇諗過一年可包攬11部戲，曾經經歷過有一套戲開已經好開心，今年對我來講好夢幻，好似中咗大獎一樣。」

本年令詩雅最深刻為電影《失眠》演出，她在戲中分演兩角，對詩雅來說是大挑戰，詩雅說：「公司竟然俾個咁好嘅角色我，我好開心喺戲中學到好多嘢，自己話自己有進步好似好奇怪，因為幸運，導演、編劇、秋生老師同林家楝，幫我去完成呢個作品，提點我一啲我忽略嘅嘢。」詩雅表示，回看自己嘅演出亦有啲驚訝，看首映先發現自己演過嘅表情，詩雅說：「好似睇緊另一個人，覺得係好唔一樣嘅我。」詩雅指最痛苦是拍攝《失眠》之前數個月，因為背景是二次世界大戰時，不斷反覆回看歷史，了解慰安婦元素，她說：「我當時係唔見人，日日困喺家中，睇好慰安婦歷史，又學芧山術，該段時間對我嚟講係黑色嘅，o依家回看作品好開心。」

眨眼入行10年嘅詩雅指，《失眠》算係自己暫時嘅代表作，她說：「我等咗足10年，終於俾我等到可以玩得咁盡興嘅角色，同自己講因為堅持，所以就做到，可以有機會演呢個角色。」經過10年磨練，冇諗過自己進步多少，她說：「我冇諗過有冇大嘅脫變，因為我唔係好識睇，之前做得好淺，o依家會諗得深啲。」

累積不少演戲經驗，對於觸碰獎項嘅時間係咪來臨，詩雅說：「作為演員當然希望想獲得提名，係觀眾對你嘅肯定，同埋代表好多人睇過你部電影，人哋先會諗起你，會投你一票，作為演員嘅強心針，獎項係被給予肯定嘅感覺。」

詩雅嘅目標係其偶像劉青雲，詩雅說：「未合作之前已經知青雲係一個好好嘅前輩，合作完更加肯定，佢會令人好舒服，佢會令拍攝順利，無論人品、演技、好穩健嘅家庭，全部配合，演技好但忽略屋企都係唔得，劉青雲嘅內外都係我嘅學習對象。」奈何青雲如此好戲亦要提名8次金像才一嚐影帝滋味，詩雅說：「知道要入圍提名獎項都唔容易，如果能夠入圍已經當自己贏咗，知道電影界卧虎藏龍，自己亦有好多進步空間，但作為演員當然想獲得鼓勵，再向下個目標進發，青雲提名8屆先攞影帝唔緊要，無論如何佢永遠都係我偶像，佢未攞獎已經係我哋心目中影帝，自己要比青雲更有恆心同韌力，專心磨練演技，最終都會得到觀眾認同，取得成功。」

現時單身嘅詩雅，自言兼顧唔到感情與工作，她說：「我拍拖一定冇時間理我男朋友，分咗手兩年，未有適合嘅出現，如果有穩定家庭，自己想每方面都做得平均，我要平衡得好啲。」詩雅指與爸媽同住亦沒時間見面，屋企人慢慢年紀大，想多點時間陪伴他們，亦想工作上有點成績，詩雅說：「前幾年全靠屋企人支持，無論精神上同金錢上，如果自己有能力，一定令佢哋活得舒服啲，起碼唔好要佢哋擔心我，我爹哋到o依家都擔心我有冇錢使，夠唔夠瞓，點解冇拖拍，希望佢哋唔好咁擔我先，佢都係覺得我哋呢行唔穩定，叫我唔使俾家用啦﹗話我如果穩定啲佢就可以退休，搞到我好大壓力，我嫁埋就可以退休。」

髮型：AnsonHo（pi4.hk）
場地提供：The Stadium Bar & Restaurant

更多娛聞，喺晒《娛果》
http://fb.com/appledailyent