黃偉文（Wyman）於二零一零年成立填詞人聯盟，睇中初出茅廬的陳詠謙簽做盟友，去年元旦日Wyman在台下看着陳詠謙奪叱咤填詞人大獎感動落淚，日前Wyman接受本報電話訪問說：「見到有盟友得獎好感動，記得咁多年都係資深填詞人攞獎，阿謙比較近期出道，有種後輩接棒感覺。」

青春最有利

為甚麽會睇中簽阿謙？Wyman說：「有次Swing搵我寫《大大公司》續集，自己太忙推咗，但都關心邊個寫咗《我有貨》呢首歌，記得有次睇音樂會，喺後台見到Swing，我話歌詞寫得幾好，點知阿謙喺我隔籬，我覺得係一種緣份，見到佢個樣，我認得佢係組合VEGA成員，覺得佢咁後生又有才華就記喺心，後來邀請佢加入填詞人聯盟。」覺得陳詠謙的歌詞水準如何？Wyman說：「我好羨慕佢青春，開始寫時得二十三歲，填詞界『小鮮肉』好fresh，未有呢批填詞人之前，十幾至六十幾歲歌手都搵我寫歌，近我年齡層歌手嘅心態會熟悉啲，其他年齡層要揣摩人嘅諗法，雖然自己都有呢方面天份，但阿謙二十歲頭更明白年輕歌手心態，佢嘅青春就係佢有利條件。」