【名家搶先睇】房屋問題非香港獨有(El.)
新西蘭房屋問題
無聊上youtube,睇到一段由台灣傳媒製作,有關香港年青人起薪點低加上畢業一身債,買樓上車難嘅短片,故事熟口熟面,反而短片下留言區爆發之網友罵戰更見搶眼。
有簡體字留言指「上海的話不吃不喝也要40年,這麼一說香港房價好像也不是很高。」、「房價問題,全球大城市哪裡都差不多。」亦有繁體字留言回覆指「城裡不好混哥就回農村,有房有車有地。」、「你們大陸人再糗有父母給你們撐著,香港父母不會給孩子撐,基本自己去打江山。」
的確,樓價升至與大眾市民收入水平脫節係環球問題,非香港獨有。但香港土地供應不足,加上對內地移民極為寬鬆嘅政策,連同政府冇足夠措施保障港人住屋需要,以及港人唔能夠透過選票改變現狀,都令港人住屋問題較其他地方更見嚴峻,年青一代有冇父母積蓄與農村祖家作後援已是次要。
以新西蘭為例,耶魯大學今年7月公佈嘅調查顯示,當地約有4萬人以街為家或需入住緊急收容設施,數目約佔全國總人口1%,有無力租屋嘅紐西蘭人選擇以租住露營車為家。新西蘭前任國家黨政府嘅人口開放政策,被指係新西蘭樓價飊升嘅罪魁禍首,而選民於早前大選中,亦透過選票作出抉擇。接任嘅新一屆工黨及紐西蘭優先黨聯合政府,亦一改前屆政府開放取態,更擬跟隨澳洲立例禁止外國人喺當地買樓。
近期香港有社福機構向低收入士提供「社會房屋共享計劃」,有20個家庭受惠,亦有發展商提供15個「低門檻上車」單位扶助年青人置業。不過筆者認為,一萬個蜻蜓點水式幫助,都遠不如政府嘅一個「港人優先」取態來得重要。
蘋果財經,關心你飯碗
http://fb.com/appledailyatm