六四事件20周年前夕在一個論壇中，指天安門學運領袖「走佬」，淡化屠城暴行，為中共塗脂抹粉嘅新「紅」人港大學生會前會長陳一諤，被同學罷免落台後沉寂一段日子，近日忽然黐上公民黨，「滲透」到梁家傑議員辦事處實習。陳一諤視國父為偶像，佢個blog仲有同國父像嘅合照，論政時愛着中山裝，但係呢期改插袋巾，好多人都估唔到有乜動機。

主動要求跟袋巾學嘢

陳一諤現就讀港大二年級，據講佢透過大學實習計劃，主動要求到袋巾議辦學嘢，實習期約半年，每星期做八小時，仲冇人工。陳一諤兩星期前報到，噚日陪同梁家傑到藍田港鐵站派宣傳五區總辭嘅《A45》號外，佢同袋巾企埋一齊嘅場面都幾令人詫異，好鬼有無間道feel。
八方致電陳一諤問佢係咪過咗底，佢好禮貌咁婉拒回應，表示實習係課程要求，唔方便受訪，遲啲先傾得。梁家傑則話一向有請大學實習生，樂意提供機會畀學生參與社會服務，又話面試時覺得陳一諤對政治極有興趣，所以請佢，「大學學習過程應該好包容、好多元化，唔同政見反而唔重要。」
梁家傑稱會因應陳一諤時間，安排佢一齊落區見街坊或開居民會，「議員要做嘅嘢，都會畀佢涉獵。」初步認為佢表現唔錯，「我覺得佢好虛心，非常有禮貌。」至於日後會唔會邀請陳一諤入黨，「順其自然啦。」

港大學生會唔再補選

港大學生公投拉陳一諤下台後，學生會過去三日舉行補選，投票噚日結束，只有860人投票，唯一一個候選會長盧重匡得451信任票，遠低於當選門檻1,068票，同時有300幾票反對佢，因此會長一職繼續懸空，由於出年初就會選舉新一屆學生會內閣，所以唔會再舉行補選。
盧重匡今次參選陳一諤係提名人，被指又係「隱形左派」，盧重匡噚日話其實另一提名人係民主派支持者，所以唔應該扣佢帽子。盧重匡曾經形容陳一諤係「自己人」，唔好輸咗就反面咁現實喎。讀三年級嘅盧重匡稱無意捲土重來，陳一諤卻仲有機會翻啅。

mailto:[email protected]