23歲嘅石天欣，2010年第24期無綫電視藝員訓練班出身，一直只做閒角，仲要係大台劇集嘅御用「被姦受害人」，搞到佢都好厭倦做呢啲學生妹同俾人強姦角色，14年毅然離開大台闖天下，當時石天欣接受《蘋果》訪問時謂自己16歲入行，一直唔介意演乜嘢角色，但年復年咁俾人強姦，實在令佢有啲厭倦。

石天欣說：「高鈞賢就一世做變態佬，我就連續三年俾人強姦！自從2013年拍《仁心解碼II》俾李家聲喺天台強姦多咗人識後，之後再喺《巨輪》同未播出嘅《再戰明天》我又要俾人姦，好似每年一部咁。公司俾晒啲慘情角色我做，令個人成日喺情緒低落狀態，好唔開心。」

喺大台4年，石天欣月薪6,000蚊，最低工資都唔夠，難怪寧願提前解約出去搵食。不過令天欣真正離開嘅原因，係因為傾續約嗰時氣氛好唔愉快，佢話：「我覺得公司政策唔係咁好，尤其呢兩年變化好大。佢哋都有加我人工，但我唔鍾意啲態度，覺得唔簽佢哋就唔得，香港剩番一間電視台咁。」

好多人話大台人工低，天欣亦好唔客氣咁話：「我相信只要我肯做，外面是但搵份工都可以搵得番呢個人工，我一直都好慳。」為幫補生計，天欣離開大台後，就去咗迪士尼做兼職，扮美國村姑sell客執貨o氹細路，時薪54蚊。據知石天欣最初係因為有套戲突然押後開，冇嘢做，咁啱迪士尼有臨時工，所以就去應徵，就係咁一拍即合，加上佢同其他員工亦有傾有講，佢都真係做得好開心，直至上周佢先喺ig到話自己最後一日返迪士尼，仲呼籲大家睇完啲玩具要有手尾放回原處，因為o依家樂園實在唔夠人手。(新聞連結： http://bit.ly/29JZDVa )