今時今日推薦股票，唔單止冇乜叫座力，如果隻股票有乜差池，更加俾人唱為「明燈」，呢一點相信股神李四叔最感同身受。不過，敏妮呢兩日睇香港同外國報紙，都不約而同睇到差唔多嘅報道，就係推介某啲股票。
前幾日睇報道引述嘅摩根大通嘅報告，分析員統計過去15年，有4隻藍籌雖經歷4次股災，但都冇減派息，包括滙控（005）、恒生（011）、利豐（494）同煤氣（003），仲預期今年yield（股息回報率）會有8%、6%、5.3%同2.3%。

噚日敏妮睇一份美國報紙，有篇報道亦列舉咗喺呢個市道之下，yield仲有6厘樓上嘅股票，當中有香煙股AltriaGroup、藥品股EliLilly、綜合企業通用電氣等。報道話雖然呢啲股份股價跌咗唔少，唔排除企業會減少派息，留番啲錢去投資或者增強自己資本。
敏妮認識一啲朋友，之前係大好友，對樓市同股市亦然，即使相信樓價會跌，但就唔信會幾成幾成咁跌，同樣對於港股亦唔信會跌得差過沙士。家陣係乜環境，唔使敏妮多講，再同呢啲朋友傾偈，佢哋嘅心態亦都180度逆轉，悲觀到你唔信。同佢哋傾高息股，佢哋就會話：「敏妮，股市有排跌，叫人睇高息股，你點知啲高息股唔會cut股息？就算佢唔cut股息，但股價一跌，收息都補唔番。」
敏妮當然唔敢喺呢段時間推介高息股叫你入市，只係有啲唔明，一隻本來百鬆啲蚊嘅股，升到兩張紅底你都夠膽追，以當時價錢計，收息都唔知有冇兩厘，但家陣隻股幾十蚊，淨計收股息都有5、6厘回報，你反而唔敢買。以事論事，即使減息一半，都有兩三厘yield，話驚個價再跌唔敢買，咁你係假設隻股會一沉不起！

買股收息係睇長線，經濟有周期，就算呢次海嘯要經歷三五年先復蘇，都會有起番嘅一日，但喺等復蘇嘅時間，仲有股息收吓，最緊要係，股票市場提供對冲風險嘅機會，真係驚買完即跌，大可以買番認沽期權做對冲。呢個時勢，有錢落袋就係好投資，你同意嗎？

溫敏妮
http://wanmanli.com/blogs/