正忙於做「地表最強世界巡迴演唱會」嘅台灣天王周杰倫（周董），繼上星期喺吉隆坡開騷前，call Uber帶老婆昆凌出遊兼偶遇fans之後（新聞連結： http://bit.ly/2bkufwS ），前日又被人撞到周董夫婦喺東京出現，當時周董着到一身黑，又戴住口罩現身，昆凌就着住吊帶牛仔短褲露腿，唔講真係唔知佢已經係一女之母。

到噚日，再有人喺日本新宿見到周董伉儷，消息指佢哋着住金色情侶波鞋，周董就黑tee襯黑白紋短褲，而紮住髻嘅昆凌就戴金邊黑超現身，跟喺老公嘅2、3個人身後位置，佢哋仲經過Tiffany & Co.舖頭o添。

據知，今次旅行係為咗慶祝今個月8號嘅台灣父親節、前日嘅七夕，同昆凌聽日23歲生日，一炮三響。雖然兩次出遊都見唔到周董愛女Hathaway出現，但日前周董喺社交網站貼人物油畫時，惹來一陣昆凌懷第2胎嘅猜測。

周董嘆完呢一輪之後，會喺今個月27號去大連繼續開騷，下個月頭轉飛新加坡，然後再返大陸嘅青島、鄭州等地大巡迴，出年1月唱到嚟香港。