【韓流】前日入伍 GD被爆包剪揼輸咗要洗碗
BIGBANGG-DRAGON入伍
韓國天團BIGBANG隊長G-DRAGON(GD)已於前日入伍,喺江原道鐵原郡陸軍第3師團白骨部隊新兵教育大隊進行為期5周嘅訓練,並於明年11月26號退伍。GD入伍當日喺軍中造成轟動,更有兵哥被韓媒影到從後拎住相機影GD,場面好笑。
而日前facebook有一則留言引起關注,事關發文嘅網民稱朋友係白骨部隊訓練所嘅助教,更係GD所屬嘅「第四中隊」嘅助教,又大方公開咗友人嘅帳號,仲叫粉絲有問題都可以私信呢個助教友人,網民更喺文章公開咗GD喺訓練所第一晚做過啲咩,包括整理行李、食晚飯,文中又指GD因為猜包剪揼輸咗,晚飯後要負責洗餐盤,隨後進行晚間點名。
同時又有GD喺訓練所嘅新相曝光,據同袍喺網上透露,噚日係受訓嘅第一日,但點知落大雨,所以所有人都着住迷彩嘅雨衣,GD雖然以帽笠頭,但粉絲仍然認到偶像。
另外,由於GD所在嘅白骨部隊有魔鬼部隊嘅稱號,所以粉絲非常關心偶像入伍後嘅狀況,又喺網上搜尋相關資料,令部隊內部如寢室、餐廳、浴室等相片都被翻摷出嚟。粉絲又擔心GD會食得唔好,就連白骨部隊每月餐單都搵到,相當誇張,據餐單顯示,除咗主食仲有水果、果汁、公仔麵等,相信GD唔會餓親。
更多韓流,喺晒《娛果》
http://fb.com/appledailyent
甚至有白骨部隊內部嘅相、餐單被翻摷流出(網上圖片)