【HotCha演唱會】Chilam獨望Crystal唱情歌 Regen踢爆:佢暗地裡好爽
張智霖Hotcha薛世恒
HotCha噚晚喺九展舉行「十周年回憶慈善演唱會」,張智霖(Chilam)擔任演唱嘉賓,去睇騷有江若琳同男友蕭潤邦、小肥、陳宇琛同老婆、鍾舒漫、楊思琦等。
一開場,HotCha就勁歌熱舞,唱咗無耐,Winkie唱《學習期》時已經開始喊,仲喊到成塊面都濕晒,Regen即時詐型:「講咗第一首歌就唔好咁快喊㗎嘛!」Winkie解釋:「因為歌詞好感動嘛!」Winkie做咗大喊包,全晚喊咗三次,完騷前最後一首歌,結果三個一齊喊。
現場又播出三位成員互相講吓大家嘅視頻,跟住再有每人solo,Regen搵咗麥秋成做跳舞嘉賓,佢唱《給十年後的我》前就話:「呢十年,我嘅情緒、性格都有改變,經歷咗好多,之前曾經揀只係最close嘅朋友喺身邊,推過好多朋友,今日好多謝佢哋嚟捧場,依然喺我身邊。」而Winkie勁歌熱舞時係咁扭籮。
嘉賓Chilam同HotCha合唱《情愛現代事故》,有好長時間,Chilam企咗喺Crystal身邊,除咗輕輕攬佢條腰,望住佢唱歌 令到Crystal尷尬面紅。Chilam踢爆綵排時,Crystal一直逃避佢嘅目光:「佢唔敢望我,我問佢係咪好驚我。」Crystal答:「Chilam眼神好攝人,等咗好多年,終於搵到佢做嘉賓,夢想成真。」最後Hotcha要求攬攬Chilam影合照,Chilam逐個抱抱。
完騷後,HotChah接受訪問,Crystal講到見到Chilam面紅:「以前拍第一個MV已經係咁,對望會面紅,望一陣已經唔可以再望。」Regen笑言:「Chilam特登整蠱Crystal望住佢唱,其實Crystal暗地裡應該覺得好爽。」
Regen提到今次演唱會有好多回憶:「啲歌好耐之前,綵排練歌諗番好多以前嘅事,今日有咁多fans嚟睇,真係好感動,希望開到part 2。」Winkie就講到自己變咗喊包:「綵排時講咗叫大家堅強唔好喊,估唔到自己最快喊,冇諗過有機會搞十周年演唱會,五年前約埋大家十周年搞騷,憑住我哋三個堅持真係夢想成真。」Hotcha會唔會重組?Regen冇正面回答:「之前只係講過搞十周年演唱會,所以大家都好專心做呢個騷。」至於Regen前緋聞男友薛世恒都有嚟捧場,Regen大方話:「梗係要嚟,佢以前係我哋老闆。」薛世恒話緋聞係九級流?Regen再話:「算啦,講咗咁耐,假變成真…我成日講錯嘢,唔知有冇用錯詞語。」Crystal幫口打圓場:「你應該話假的真不了!」
另外,薛世恒接受訪問時,講到以前同Regen傳緋聞係九級流:「咁多緋聞,呢個比較流,流之中好多種,呢單假啲,我係佢經理人,見藝人好合理,冇理由變成咁。」問到三個成員點解只係同Regen傳緋聞?佢反問:「係囉,我都唔知點解。十年,好開心睇住佢哋成長,希望再合作。」問到如果陳法拉搞騷會唔會去捧場?佢話:「真係先算啦!呢個世界太多如果。」
精選娛聞,喺晒《娛果》
http://fb.com/appledailyent
Hotcha想遲啲開演唱會part 2。攝影:仇志德
前老闆薛世恒,仲有諸葛紫岐帶埋旗下藝人曾傅君去捧場
鍾舒漫、江若琳同男友、小肥等,好多圈中朋友去支持Hotcha