大家出嚟返工，成日聽到前輩講：「一蟹不如一蟹！」其實唔只職場，籃球場都係咁啦！

NBA人才輩出，但相信有唔少球迷會覺得以前啲球星係勁啲，剩係「波神」米高佐敦（MichaelJordan），同前湖人球星拜恩（KobeBryant）兩位男神中嘅男神，已經冇得輸啦！兩位成功嘅關鍵係乜，唔係打波天份有幾高，而係佢哋堅勤力！不過今年選秀會畀76人揀中嘅狀元賓西蒙斯（BenSimmons）似乎唔係咁啦。呢位19歲、6呎10吋嘅前鋒，冇打到上周三同四嘅夏季聯賽，原因竟然係要休息喎！咁樣梗係搞到某啲前輩不滿啦，就好似幫活塞贏過兩次總冠軍嘅傳奇控衞湯馬士（IsiahThomas）話：「得嗰19歲仔，想賺錢，就要落場打波啦！」

畀塞爾特人揀中嘅探花謝連布朗（JaylenBrown）就唔同啦。上周五打完對拓荒者場夏季聯賽，貢獻21分、7籃板、5偷波嘅佢被問及會唔會休息吓，同樣係19歲嘅布朗話：「我死咗，先可以休息！」嘩！幾熱血啊，咁先係正確態度嘛！